“მეგობრობის დღიური” ჰეტერონორმატიულ კონტექსტში პირველი ქვიარ სიყვარულის გამოცდილებებს აღწერს, იმ გულწრფელ, დაუმუშავებელ გრძნობებს, რომლებიც კულტურული, სოციალური თუ პოლიტიკური კონტექსტის მიუხედავად, ერთნაირი ძალით დაატყდება თავს ყველას, განურჩევლად გენდერული იდენტობისა თუ სექსუალური ორიენტაციისა.
თუმცა ჰეტერონორმატიულ გარემოში პირველად განცდილ ქვიარ გრძნობებს ზოგჯერ დამატებითი გაურკვევლობა, გაკვირვება და შიში შეიძლება ახლდეს. სწორედ ამიტომ მივიჩნიეთ მნიშვნელოვნად, „მეგობრობის დღიურის“ რესპონდენტებს პირველი ქვიარ სიყვარულის გამოცდილების შესახებ მოგონებები გაეზიარებინათ.
ბევრი ჩვენგანის ბავშვობაში პირველ სიყვარულზე საუბარი მეგობრობის დღიურის ჩანაწერებს უკავშირდება. ამდენად, ამ ფორმატის არჩევა პირველ ქვიარ გრძნობებზე თხრობის საშუალებასთან ერთად, დავიწყებული პრაქტიკის და ბავშვობის საყვარელი რიტუალის გახსენებაცაა.
ქვიარ ქალები, რომლებიც, საქართველოს კონტექსტში, ლგბტქი ადამიანებს შორის ერთ-ერთი ყველაზე უხილავი ჯგუფია, დღიურის საშუალებით, ანონიმურად ყვებიან თავიანთ ამბებს. ამგვარად, ანონიმურობა, რაც მეგობრობის დღიურებსაც ახასიათებდა, აქ ორმაგად სიმბოლურია.
პროექტის პირველი ნაწილი მოიცავდა ფიზიკური დღიურის შექმნას. მონაწილეებმა ხელნაკეთი მეგობრობის დღიური ხელით შეავსეს. შემდეგი ეტაპი დღიურის ონლაინ და ინტერაქტიულ ფორმატში გადმოტანა იყო WISG ნარატივების პლატფორმაზე, რომლის მკითხველსაც საშუალებას ვაძლევთ დღიური თავადაც შეავსოს და პირველი ქვიარ გრძნობების შესახებ მოგვიყვეს.
